பார்க்க

E   |   සි   |  

2022-05-24

செய்தி வகைகள் : குழு செய்திகள் 

வரையறுக்கப்பட்ட டபிள்யு. எம். மெண்டிஸ் மற்றும் நிறுவனம் ஒரே சொத்தை இரு அரச வங்கிககளில் அடமானம் வைத்து கடன் பெற்றுள்ளதா என்பது தொடர்பில் கோப் குழுவில் அவதானம்

வரையறுக்கப்பட்ட டபிள்யு. எம். மெண்டிஸ் மற்றும் நிறுவனம் ஒரே சொத்தை இலங்கை வாங்கி மற்றும் மக்கள் வங்கியில் அடமானம் வைத்து கடன் பெற்றுள்ளதா என்பது தொடர்பில் கோப் குழுவில் அவதானம் செலுத்தப்பட்டது.

இலங்கை வங்கியின் 2018 மற்றும் 2019 நிதியாண்டுக்கான கணக்காய்வாளர் நாயகத்தின் அறிக்கை மற்றும் அதன் தற்போதைய செயலாற்றுகை தொடர்பில் ஆராயும் வகையில் பாராளுமன்ற உறுப்பினர் (பேராசிரியர்) கௌரவ சரித ஹேரத் தலைமையில் இன்று (24) நடைபெற்ற அரசாங்க பொறுப்பு முயற்சிகள் பற்றிய  குழுக் கூட்டத்தின் போதே இது பற்றி கலந்துரையாடப்பட்டது.

கடந்த ஐந்தாண்டுகளில் அதிக செயற்படாத கடன்களைக் கொண்ட சில நிறுவனங்கள் தொடர்பில் கலந்துரையாடப்பட்டதுடன், இதன்போது வரையறுக்கப்பட்ட டபிள்யு. எம். நிறுவனம் தொடர்பில் இவ்வாறு அவதானம் செலுத்தப்பட்டது. அதற்கமைய வரையறுக்கப்பட்ட டபிள்யு. எம். மெண்டிஸ் நிறுவனம் 2021 ஆம் ஆண்டு வரை பெற்றுக்கொள்ளப்பட்டுள்ள கடன்களுக்கு அடமானம் வைத்துள்ள சொத்துக்கள் தொடர்பில் வருகை தந்த பாராளுமன்ற உறுப்பினர்கள் இலங்கை வங்கி அதிகாரிகளிடம் வினவினர். இதன்போது அதிகாரிகள் குறித்த சொத்துக்கள் தொடர்பில் தெரிவிக்கும் போது, பாராளுமன்ற உறுப்பினர்களான கௌரவ பாட்டளி சம்பிக ரணவக்க மற்றும் கௌரவ எஸ்.எம். மரிக்கார் ஆகியோர், அண்மையில் மக்கள் வங்கி கோப் குழு முன்னிலையில் அழைக்கப்பட்ட போது இந்த நிறுவனம் குறித்த சொத்தை அடமானம் வைத்து மக்கள் வங்கியிலும் கடன் பெற்றுள்ளதாக மக்கள் வங்கி அதிகாரிகள் தெரிவித்ததாக குறிப்பிட்டனர். ஒரே சொத்தை அடமானம் வைத்து இந்த இரண்டு வங்கிகளிலிருந்தும் சுமார் 7 பில்லியன் ரூபா கடன் பெற்றுள்ளதாக தெரிவித்தனர். இதனால், இது தொடர்பில் குற்றவியல் விசாரணைத் திணைக்களத்தினால் விசாரணை ஒன்றை மேற்கொள்ள நடவடிக்கை எடுக்க வேண்டும் எனப் பாராளுமன்ற உறுப்பினர்கள் சுட்டிக்காட்டினர்.  

இது தொடர்பான நடவடிக்கை எடுக்கவேண்டியதன் அவசியம் தொடர்பில் குழுவின் தலைவர் சுட்டிக்காட்டியதுடன், இது போன்ற கடுமையான விடயங்கள் தொடர்பில் கூடிய அவதானம் செலுத்தப்பட வேண்டும் எனவும் அவர் குறிப்பிட்டார். அதற்கமைய, எதிர்காலத்தில் உரிய இரண்டு வங்கிகளையும் குழுவுக்கு அழைத்து இது தொடர்பில் அறிக்கை ஒன்றைத் தயாரித்து அந்த அறிக்கை மூலம் இந்த விடயங்கள் தொடர்பில் தேவையான சட்டரீதியான நடவடிக்கைகளை எடுக்க எதிர்பார்ப்பதாக கோப் குழுவின் தலைவர் குறிப்பிட்டார்.  

அதேபோன்று, 2020 இல் பணிப்பளார் சபை தீர்மானத்துக்கு அமைய வங்கியினால் ஆரம்ப முதிர்வு ஓய்வூதிய நலனாக முன்னாள் பொது முகாமையாளருக்கு செலுத்தப்பட்ட சர்ச்சைக்குரிய 32,039,733 ரூபா நிதி தொடர்பில் கோப் குழுவில் கலந்துரையாடப்பட்டது. இந்த முகாமையாளர் ஆரம்ப முதிர்வு ஓய்வூதியம்  செல்ல நடவடிக்கை எடுக்கும் போது தொழிற்சங்கங்கள் வேலை திருத்தம் மேற்கொண்டதாகவும், இதனால் ஒரு நாளைக்கு 75 மில்லியன் ரூபா நட்டம் ஏற்பட்டதாகவும் இலங்கை வங்கியின் தலைவர் இதன்போது குறிப்பிட்டார். இதனால் அந்த வேலைநிறுத்தத்தை விரைவாக நிறைவு செய்வதற்கு இந்தத் தீர்மானம் எடுக்கவேண்டி ஏற்பட்டதாக தெரிவித்தார். எனினும் இது தொடர்பில் விடயத்துக்குப் பொறுப்பான அமைச்சரை அறிவுறுத்தியதாகவும் அவர் குறிப்பிட்டார். வங்கிக்கு ஒரு நாளில் ஏற்பட்ட நட்டம் பல நாட்கள் இடம்பெறக்கூடும் என்பதால் இந்த தீர்மானம் எடுக்கப்பட்டுள்ளதாக இலங்கை வங்கியின் தலைவர் மேலும் தெரிவித்தார்.  
 
மேலும், அரசுக்கு சொந்தமான முயற்சியாண்மைகளின் கடன்கள் மற்றும் முற்பணங்களின் மொத்த பற்றாக்குறை தொடர்பில் கோப் குழுவில் கலந்துரையாடப்பட்டது. கடன்களை மீளப்பெற இயலாத அரசாங்க முயற்சியாண்மைகளுக்கு கடன் வழங்குவது பொருத்தமலில்லை என இதன்போது பாராளுமன்ற உறுப்பினர் கௌரவ (கலாநிதி) ஹர்ஷ டி சில்வா தெரிவித்தார்.

அத்தியாவசிய உணவுகள் மாற்று சேவைகளை பெற்றுக்கொள்வதில் இலங்கை வங்கிக்கு காணப்படும் இயலுமை மற்றும் எதிர்கால நடவடிக்கைகள் குறித்தும் குழுவில் கலந்துரையாடப்பட்டது.

கணக்கிடப்படாத ஏனைய துறைகளையும் சேர்த்து நிலைமை அறிக்கையொன்றை ஒரு மாத காலத்துக்குள் வழங்குமாறு கோப் குழுவின் தலைவர் கௌரவ (பேராசிரியர்) சரித ஹேரத் பரிந்துரை வழங்கியதுடன், நாட்டின் பிராதன வங்கியாக இலங்கை வங்கி எடுக்கும் சரியான தீர்மானங்களை பாராட்டுவதாகவும், பிழையான விடயங்கள் காணப்பட்டால் அவற்றை திருத்திக்கொள்ள வேண்டும் எனவும் அவர் குறிப்பிட்டார்.
 
இந்தக் குழுக் கூட்டத்தில் பாராளுமன்ற உறுப்பினர்களான கௌரவ மஹிந்தானந்த அழுத்கமே, கௌரவ ரவுப் ஹக்கீம், கௌரவ பாட்டளி சம்பிக்க ரணவக்க, கௌரவ இரான் விக்ரமரத்ன, கௌரவ (கலாநிதி) ஹர்ஷ டி. சில்வா, கௌரவ (கலாநிதி) சரத் வீரசேகர, கௌரவ ஜகத் புஷ்பகுமார, கௌரவ (கலாநிதி) நாளக கொடஹேவா ஆகியோர் கலந்துகொண்டனர்.

 

1 2

3 4

5 6

7 8

 



தொடர்புடைய செய்திகள்

2026-11-18

விவசாயத் திணைக்களத்தின் நீண்டகாலமாகத் தீர்க்கப்படாத நான்கு முற்பணக் கணக்குகளின் செயற்பாட்டு நட்டங்களை நீக்குவதற்கு அரசாங்கக் கணக்குகள் பற்றிய குழுவில் அனுமதி

விவசாயத் திணைக்களத்துடன் தொடர்புடைய நீண்டகாலமாகத் தீர்க்கப்படாத நான்கு முற்பணக் கணக்குகளில் காணப்படும் செயற்பாட்டு நட்டங்களை நீக்குவதற்கு இணக்கம் தெரிவிக்கப்பட்டுள்ளது. அரசாங்கக் கணக்குகள் பற்றிய குழு அதன் தலைவர் கௌரவ பாராளுமன்ற உறுப்பினர் கபீர் ஹாஷிம் அவர்களின் தலைமையில் அண்மையில் (நவ. 17) பாராளுமன்றத்தில் கூடியபோதே இதற்கான இணக்கம் தெரிவிக்கப்பட்டது.அதன்படி, 1996ஆம் ஆண்டு நிறைவுசெய்யப்பட்ட உருளைக்கிழங்கு பயிர்ச்செய்கை விரிவாக்கத் திட்டத்திற்குரிய முற்பணக் கணக்கில் காணப்படும் 23.97 மில்லியன் ரூபா நட்டம், வெலிசர விவசாயப் பணிமனையை நடத்துவதற்கான முற்பணக் கணக்கில் காணப்படும் 5 மில்லியன் ரூபா நட்டம், விவசாயப் பழுதுபார்ப்புப் பணிமனை முற்பணக் கணக்கில் காணப்படும் 35.7 மில்லியன் ரூபா நட்டம் மற்றும் நாரஹேன்பிட்டிய விவசாய மத்திய களஞ்சியசாலை தொடர்பான முற்பணக் கணக்கில் காணப்படும் 421,884 ரூபா நட்டம் ஆகியவற்றைத் தீர்ப்பது தொடர்பில் இதன்போது ஆராயப்பட்டது.இந்தக் கணக்குகளில் நீண்டகாலமாக நிலவிவரும் நட்டங்கள் மற்றும் கணக்குகளின் இருப்புத் தொகைகளில் காணப்படும் முரண்பாடுகளைத் தீர்ப்பதற்காக முன்வைக்கப்பட்ட விடயங்களை ஆராய்ந்த குழு, குறித்த கணக்குகளில் காணப்படும் நட்டங்களை நீக்குவதற்கும் இருப்புத் தொகைகளில் காணப்படும் வேறுபாடுகளைத் திருத்துவதற்கும் இணக்கம் தெரிவித்தது.மேலும், எதிர்காலத்தில் இவ்வாறான கணக்கியல் பிரச்சினைகள் ஏற்படுவதைத் தவிர்ப்பதற்காக முறையான கணக்குகளைப் பேணுதல், உரிய கணக்காய்வு நடைமுறைகளைப் பின்பற்றுதல் மற்றும் நிதி முகாமைத்துவத்தைக் கட்டுப்பாட்டுடன் வலுப்படுத்துதல் ஆகியவற்றின் முக்கியத்துவமும் இதன்போது வலியுறுத்தப்பட்டது.இந்தக் கூட்டத்தில் கௌரவ பிரதி அமைச்சர் மேஜர் ஜெனரல் (ஓய்வு) அருண ஜயசேகர, கௌரவ பாராளுமன்ற உறுப்பினர்களான அஜித் பி. பெரேரா, ஹெக்டர் அப்புஹாமி, சட்டத்தரணி துஷாரி ஜயசிங்க, சுசந்த குமார நவரத்ன, லால் பிரேமநாத், ஓஷானி உமங்கா, சட்டத்தரணி சாகரிகா அதாவுத, கவீந்திரன் கோடீஸ்வரன், சுனில் ரத்னசிறி மற்றும் ருவன்திலக ஜயக்கொடி ஆகியோர் கலந்துகொண்டனர்.


2026-11-18

கம்பஹா மாவட்ட “சணச” சங்கத்தின் நிதி நெருக்கடிக்குத் தீர்வுகாண வைப்பாளர்களின் பணத்தை மீளச் செலுத்துவதற்கான பொறிமுறையைத் தயாரிப்பது தொடர்பில் கோபா உபகுழுவில் அவதானம்

கம்பஹா மாவட்ட “சணச” சங்கத்தில் இடம்பெற்றுள்ள நிதி முறைகேடுகள் மற்றும் வைப்பாளர்களின் பணத்தை மீளச் செலுத்த முடியாத நிலைமை தொடர்பில் கலந்துரையாடுவதற்காக, அரசாங்கக் கணக்குகள் பற்றிய குழுவினால் நியமிக்கப்பட்ட கூட்டுறவுத் துறையில் நிலவும் நெருக்கடிகள் தொடர்பில் ஆராய்வதற்கான உபகுழு, அதன் தலைவர் கௌரவ பாராளுமன்ற உறுப்பினர் ருவன்திலக ஜயக்கொடியின் தலைமையில் அண்மையில் பாராளுமன்றத்தில் கூடியது.கம்பஹா மாவட்ட “சணச” சங்கத்தின் முகாமைத்துவத்தின் பலவீனங்கள் தொடர்பான கணக்காய்வாளர் நாயகத்தின் அறிக்கையில் குறிப்பிடப்பட்டுள்ள விடயங்கள் குறித்து இங்கு ஆராயப்பட்டதுடன், உரிய அனுமதியின்றி சங்கத்தின் நிதி தனியார் நிறுவனங்களில் முதலீடு செய்யப்பட்டமையால் ஏற்பட்டுள்ள நிதி நெருக்கடி குறித்தும் விரிவாகக் கலந்துரையாடப்பட்டது. இந்த முதலீடுகள் காரணமாக உறுப்பினர்கள் மற்றும் வெளிப்புற வைப்பாளர்களின் வைப்புப் பணத்தை மீளச் செலுத்த முடியாத நிலைமை ஏற்பட்டுள்ளதாக இதன்போது தெரியவந்தது.மேலும், கூட்டுறவுத் திணைக்களத்தின் மேற்பார்வை மற்றும் ஒழுங்குபடுத்தல் செயற்பாடுகளில் காணப்பட்ட குறைபாடுகள், சங்கத்தின் சொத்துக்களைத் தீர்ப்பதில் உள்ள சிக்கல்கள், நீதிமன்றத் தடையுத்தரவுகள் மற்றும் சம்பந்தப்பட்ட பொறுப்புவாய்ந்த தரப்பினருக்கு எதிராக சட்ட நடவடிக்கை எடுக்க வேண்டியதன் அவசியம் குறித்தும் கலந்துரையாடப்பட்டது.வைப்பாளர்களின் பணத்தை மீள வழங்குவதற்காக, சங்கத்திற்குச் சொந்தமான சொத்துக்களை மதிப்பீடு செய்து அவற்றை விற்பனை செய்வதற்கான சாத்தியக்கூறுகளை ஆராய்தல், சொத்துக்களை அகற்றுவதற்கு நீதிமன்றத்தினால் விதிக்கப்பட்டுள்ள தடையுத்தரவுகளை நீக்குவதற்குத் தேவையான நடவடிக்கைகளை மேற்கொள்ளுதல் மற்றும் தற்போது கையிருப்பில் உள்ள நிதியை வைப்பாளர்களிடையே நியாயமான அடிப்படையில் பகிர்ந்தளித்தல் தொடர்பிலும் இதன்போது கவனம் செலுத்தப்பட்டது.அத்துடன், அங்கீகரிக்கப்படாத முதலீடுகளை மேற்கொண்டமைக்குப் பொறுப்பான முன்னாள் பணிப்பாளர் சபை உறுப்பினர்களிடமிருந்து அதற்கான நட்டஈட்டுத் தொகையை அறவிடுதல், சம்பந்தப்பட்ட தனியார் நிறுவனத்திற்கு எதிராக சட்ட நடவடிக்கை எடுத்தல் மற்றும் நிறைவு செய்யப்படாத திட்டங்களைப் பூர்த்தி செய்து அவற்றின் மூலம் வருமானம் ஈட்டுவதற்கான சாத்தியக்கூறுகள் குறித்தும் கலந்துரையாடப்பட்டது.வைப்பாளர்களின் முழு வைப்புத் தொகையையும் மீளச் செலுத்துவதற்கான தெளிவானதும் நடைமுறைச் சாத்தியமானதுமான பொறிமுறையொன்றை முன்வைக்க வேண்டியதன் அவசியம் இதன்போது வலியுறுத்தப்பட்டது. அத்துடன், எதிர்கால நடவடிக்கைகள் தொடர்பில் கூட்டுறவு அபிவிருத்தித் திணைக்களத்தின் மேல் மாகாண மற்றும் கம்பஹா மாவட்ட அதிகாரிகளுடனும் கலந்துரையாடப்பட்டது.இந்தக் கூட்டத்தில் உபகுழுவின் கௌரவ பாராளுமன்ற உறுப்பினர்களான சட்டத்தரணி துஷாரி ஜயசிங்க, டீ. கே. ஜயசுந்தர மற்றும் சுசந்த குமார நவரத்ன ஆகியோரும் கலந்துகொண்டனர்.


2026-11-17

விஞ்ஞானம், தொழில்நுட்பம் மற்றும் டிஜிட்டல் பரிணாமம் பற்றிய துறைசார் மேற்பார்வைக் குழு பல முக்கிய நிறுவனங்களுக்கு கண்காணிப்பு விஜயம்

விஞ்ஞானம், தொழில்நுட்பம் மற்றும் டிஜிட்டல் பரிணாமம் பற்றிய துறைசார் மேற்பார்வைக் குழு, விஞ்ஞானம் மற்றும் தொழில்நுட்ப அமைச்சின் கீழ் இயங்கும் பல நிறுவனங்களுக்கு கண்காணிப்பு விஜயமொன்றை மேற்கொண்டது.இதற்கமைய, குழுவினர் இன்று (நவ. 17) இலங்கை நானோ தொழில்நுட்ப நிறுவனம் (SINTEC) மற்றும் இலங்கை உயிரித் தொழில்நுட்ப நிறுவனம் (SLIBTEC) ஆகிய நிறுவனங்களுக்கு விஜயம் செய்து அவற்றின் செயற்பாடுகளைப் பார்வையிட்டனர்.2025/2026 ஆம் ஆண்டுகளுக்கான குறித்த நிறுவனங்களின் முன்னேற்றங்களை மீளாய்வு செய்தல், 2027 ஆம் ஆண்டுக்கான செயற்பாட்டுத் திட்டத்தைப் பரிசீலித்தல் மற்றும் நிறுவன வளாகங்களில் முன்னெடுக்கப்படும் செயற்பாடுகளை அவதானித்தல் ஆகியன இந்த விஜயத்தின் நோக்கங்களாகும்.குழுவின் தலைவர் கௌரவ பாராளுமன்ற உறுப்பினர் வைத்தியர் ஜனக சேனாரத்ன தலைமையில் மேற்கொள்ளப்பட்ட இந்தக் கண்காணிப்பு விஜயத்தில் கௌரவ பாராளுமன்ற உறுப்பினர்களான தனுர திசாநாயக்க, லசித் பாஷண கமகே மற்றும் சதுர கலப்பத்தி ஆகியோரும் கலந்துகொண்டனர்.


2026-11-17

ஆசிரியர் சேவையிலிருந்து அதிபர் சேவைக்கு நியமிக்கப்படும்போது ஏற்படும் சம்பள முரண்பாடுகள் மற்றும் சேவைப் பிரமாணக் குறிப்புத் திருத்தங்கள் தொடர்பில் பாராளுமன்ற உபகுழுவில் தொடர்ந்தும் கலந்துரையாடல்

ஆசிரியர் சேவையிலிருந்து அதிபர் சேவைக்கு நியமிக்கப்படும்போது ஏற்படும் சம்பள முரண்பாடுகள் தொடர்பில், கல்வி, தொழிற்படை மற்றும் மனித மூலதனம் பற்றிய துறைசார் மேற்பார்வைக் குழுவினால் நியமிக்கப்பட்ட உபகுழுவில் மேலும் கலந்துரையாடப்பட்டது.குறித்த உபகுழு அதன் தலைவர் கௌரவ பாராளுமன்ற உறுப்பினர் சுனில் ராஜபக்ஷ தலைமையில் அண்மையில் கூடியபோதே இவ்விடயம் தொடர்பில் கலந்துரையாடப்பட்டது.இக்கலந்துரையாடலில் கல்வி, உயர்கல்வி மற்றும் தொழிற்கல்வி அமைச்சு, நிதி, திட்டமிடல் மற்றும் பொருளாதார அபிவிருத்தி அமைச்சு, பொது நிர்வாகம், மாகாண சபைகள் மற்றும் உள்ளூராட்சி அமைச்சு, அரச சேவை ஆணைக்குழு ஆகியவற்றைப் பிரதிநிதித்துவப்படுத்தி சிரேஷ்ட அதிகாரிகள் கலந்துகொண்டனர்.ஆசிரியர் சேவையைச் சேர்ந்த அதிகாரிகள் அதிபர் சேவைக்கு நியமிக்கப்படும்போது ஏற்படும் சம்பள அதிகரிப்பு இடைவெளிகள் மற்றும் சம்பள முரண்பாடுகள் தொடர்பில் இங்கு விரிவாகக் கலந்துரையாடப்பட்டது. ஒரு சேவைக்கு மாத்திரம் தனித்தனியாக சம்பளத் திருத்தங்களை மேற்கொள்வதன் மூலம், ஒட்டுமொத்த அரச சேவையின் ஏனைய சேவைகளுடன் ஒப்பிடுகையில் பிரச்சினைகள் ஏற்படுவதாகவும் இதன்போது சுட்டிக்காட்டப்பட்டது.சேவைப் பிரமாணக் குறிப்புகள் மற்றும் ஆட்சேர்ப்புக்கான வயதெல்லைகளைத் திருத்துதல், அதிபர்களுக்கான விசேட கொடுப்பனவுகள் மற்றும் போக்குவரத்து வசதிகள், பாடசாலை வகைப்படுத்தல் மற்றும் வெற்றிடங்களை நிரப்புதல், முறையான இடமாற்றக் கொள்கை, ஆசிரியர் மற்றும் அதிபர் உத்தியோகபூர்வ இல்லங்களைப் புனரமைத்தல் உள்ளிட்ட பல்வேறு விடயங்கள் தொடர்பில் அதிகாரிகளுடன் உபகுழு விரிவாகக் கலந்துரையாடியது.இவ்விடயம் தொடர்பில் மேலும் கலந்துரையாடிய பின்னர், முன்மொழிவுகளை உள்ளடக்கிய இறுதி அறிக்கையை துறைசார் மேற்பார்வைக் குழுவிடம் சமர்ப்பிக்கத் திட்டமிடப்பட்டுள்ளது.இக்கூட்டத்தில் கௌரவ பாராளுமன்ற உறுப்பினர்களான அபூபக்கர் அத்தம்பாவ, சுகத் வசந்த. டி சில்வா, சுஜீவ திசாநாயக்க மற்றும் சானக மாதுகொட ஆகியோரும் கலந்துகொண்டனர்.






பதிப்புரிமை © இலங்கை பாராளுமன்றம்.

முழுப்பதிப்புரிமையுடையது.

வடிவமைத்து உருவாக்கியது  TekGeeks